MALBIKSHESTAR

Mynd: Hrefna María Ómarsdóttir

Myrkva okkar hefur dvalið síðustu misseri í góðu yfirlæti hjá ræktenda sínum í Álfhólum á meðan húsfreyjan gekk með barn sitt og fæddi. Á þeim tíma hefur Myrkva bætt sig mikið, sérstaklega á tölti og þroskast í alla staði.

Þegar við eignuðumst Myrkvu tveggja vetra gamla gekk hún undir nafni "Litla ljót með lipran fót". Við gerðum okkur því grein fyrir því strax í upphafi að 1. verðlaun fyrir byggingu væri ekki í boði fyrir þessa lipru klárhryssu og frægðarsaga á kybótabraut yrði ekki hennar örlög. Fótaburður og fas er hins vegar hennar tebolli og möguleikar hennar á keppnisbrautinni eru líklega betri. Mörg systkini hennar hafa getið sér góðs orðspors í keppni þar á meðal Mózart, Hrafnar og Hrafntinna frá Álfhólum.

Það var engu að síður freistandi að fá á hana tölur hjá ráðunautunum og við erum nokkuð sátt við fyrstu tilraun hennar í braut. Nýja dómskerfið hefur ekki mjög mikil áhrif á Myrkvu þar sem hún er með gott fet en einkunin hefði samt verið hærri (7.73) í gamla kerfinu. Myrkva er enn í þróun og á töluvert inni með meiri styrk og þjálfun. Við höfðum engu að síður áhuga á að sjá hvað hún fengi, sérstaklega fyrir byggingu og líka fyrir kosti á þessu stigi þrátt fyrir að hún væri ekki búin að toppa sig í þjálfuninni.

Hestaflensan hefur vissulega sett sitt mark á þjálfun Myrkvu eins og önnur hross og þrekleysi gerði vart við sig í sýningunni þegar hún var krafin fullra afkasta í braut. Jafnframt hafa meiðsl á afturfæti aftrað almennilegri spyrnu á brokki og stökki og við teljum Myrkvu eiga mikið inni fyrir þær gangtegundir. Þrjár 8,5 í hús eru hins vegar gleðiefni - fyrir tölt, fet og vilja og geðslag. Að auki fékk hún ákjósanleg dómsorð, meðal annars um taktfestu, ásækni, svif og mikinn fótaburð.

Meðfylgjandi er dómurinn frá sýningunni og það er aldrei að vita nema við rennum henni í gegnum kynbótabrautina að ári ef við teljum hana eiga þangað erindi. Þangað til munum við leika okkur og njóta góðra stunda. 

Sjá fleiri myndir frá sýningunni HÉR. 

 

IS-2004.2.84-670 Myrkva frá Álfhólum

Sýnandi: Sara Ástþórsdóttir Mál (cm): 137   135   65   144   27,0   17,0   Hófa mál: V.fr. 8,3   V.a. 8,1  Aðaleinkunn: 7,69

Sköpulag: 7,73	Kostir: 7,67
Höfuð: 7,0    F) Krummanef   L) Löng eyru   Háls/herðar/bógar: 7,5    7) Háar herðar   D) Djúpur   Bak og lend: 8,0    7) Öflug lend   D) Framhallandi bak   Samræmi: 8,0    3) Langvaxið   E) Þungbyggt   Fótagerð: 8,0 Réttleiki: 8,0 Hófar: 7,5    C) Efnisþunnir   Prúðleiki: 8,0	Tölt: 8,5    2) Taktgott   3) Há fótlyfta   Brokk: 7,5    5) Há fótlyfta   B) Ferðlítið   Skeið: 5,0 Stökk: 8,0    3) Svifmikið   Vilji og geðslag: 8,5    2) Ásækni   Fegurð í reið: 8,0    4) Mikill fótaburður   A) Lágreist   Fet: 8,5    2) Rösklegt   3) Skrefmikið   Hægt tölt: 8,0 Hægt stökk: 7,0