Um helgina mættum við Myrkva frá Álfhólum á Bleika töltmótið í Víðidal til styrktar Krabbameinsfélagi Íslands. Þetta er okkar fyrsta töltmót og líklega eru liðin ein fimmtán ár síðan ég reið síðast töltprógramm ein í braut og ekki minna en tíu ár síðan ég tók síðasti þátt í töltikeppni.

Þetta er ekki okkar sterkasta grein, Myrkva er mun sterkari á fjórgangsvængnum en við höfum gott af æfingunni og undirbúnings þjálfuninni fyrir töltmót. Það er líka um að gera að æfa sig í þessari grein þar sem ekki eru önnur mót en töltmót í boði hjá stærsta hestamannafélagi landsins fyrr en blásið verður til Reykjavíkurmeistaramóts í maíbyrjun.

Við Myrkva skráðum okkur til leiks í opna flokkinum og hlutum einkunnina 6,20 í forkeppni, sem hefði skilað okkur í þriðja sætið inn í A-úrslit í styrkleikaflokknum fyrir neðan. Við fengum tækifæri til að æfa okkur í B-úrslitum í opna flokknum, fengum 6,33 í einkunn sem verður að teljast ásættanlegt á okkar fyrsta töltmóti í byrjun vetrar. Hér má sjá fleiri myndir frá Bleika töltmótinu.

Ég er sátt við formið á okkur miðað við árstíma en aðeins er liðinn rúmur mánuður síðan Myrkva kom á hús. Við þurfum hins vegar að fínstilla eitt og annað fyrir næsta mót og vonandi verðum við komnar í gott form fyrir aðalmótin í vor en þá ætlum við að reyna okkur í enn annari greininni, B-flokki gæðinga. 

Það hefur varla farið framhjá nokkrum manni að veturinn er genginn í garð í allri sinni dýrð. Álíka vetur höfum við ekki upplifað ì að minnsta kosti áratug.

Umhleypingarnar eru verstar, blindbylur og rigning til skiptist með tilheyrandi òfærð og hálku. Það er vissulega svekkjandi að geta ekki riðið almennilega út utandyra vikum saman því færið hefur verið frábært þá daga sem veðrið er skaplegt. Tíminn er því að mestu nýttur til nauðsynlegra verkefna innandyra í reiðhöllinni og prísa ég mig sæla að hafa aðgengi að frábærri inniaðstöðu.

Hryssurnar okkar koma afar vel undan hausti og hafa líklega aldrei verið betri í upphafi vetrar. Hver dagur færir okkur vonandi nær takmarkinu og ég hef góða tilfinningu fyrir nýju ári. Ég er enn að bíða eftir fari fyrir síðustu hestana okkar í bæinn en fyrirhugaðar ferðir fallið niður í þessari veðráttu. Það verður spennandi að halda áfram þar sem frá var horfið með yngri hrossin.

En hestamennskan er tímafrekt áhugamál og fyrir venjulegt fjölskyldufólk getur reynst erfitt að réttlæta langa dvöl í hesthúsinu á þessum árstíma. Við brugðum því á það ráð að fá duglega stúlku til okkar í hesthúsið sem mun aðstoðar okkur í vetur, bæði við hirðingar og þjálfun unghestanna.

Hesthúsið er vissulega góð hvíld frá erli dagsins og mikilvægur staður fyrir alla hestamenn til að endurhlaða starfsorkuna fyrir nýjan vinnudag en það má ekki vera kvöð að sinna áhugamálinu sínu. Með hverjum degi styttist í vorið og lok dimmra og kaldra vetrarkvölda. Tilhugsunin um grænar grundir og bjarta daga kemur bæði knapa og hesti yfir erfiðasta þjálfunartímabil ársins.

__Við förum vikulega í hausthagann til að fylgjast með líðan hestana á þessum árstíma og tókum nokkrar myndir af því tilefni áður en snjórinn huldi jörðu.

Um næstu helgi munum við flytja stóðið okkar í Kjósina þar sem yngri hrossin okkar verða í vetrarbeit hjá Sigurbirni í Kiðafelli. Þau eru feit og fín eftir beitina í grösugum hausthaganum.

_Haustvinnan með unghrossin gekk vel í október en það var kominn tími á smá hesthúshvíld fyrir fjölskylduna undir lok mánaðar eftir 15 mánaða samfellda hesthústörn. Hekla frá Reykjavík var komin vel inn í töltið og það er mikið tilhlökkunarefni að halda áfram með hana þegar tími vinnst til. Hún er litli ljóti andarunginn sem gæti breyst í svan með frekari þjálfun. Skírnir frá Reykjavík er einnig á beinu brautinni og líklega verður hann á húsi hjá okkur í vetur. Ekki vannst tími fyrir þriggja vetra hryssurnar að þessu sinni og bíða þær betri tíma með vorinu.

Framundan er spennandi vetur með töluverðu annríki en húsfreyjan hefur ákveðið að setjast á skólabekk í Háskóla Íslands eftir 10 ára námshlé. Dagarnir verða þétt skipaðir á komandi vetri því nám samhliða fullu starfi, fjölskyldu og auðvitað hrossunum krefst mikillar skipulagningar. Vonandi hefst þetta allt á endanum með góðri samvinnu en við ætlum af þessum sökum aðeins að taka þrjú hross á hús þennan veturinn.

Erfiðast verðum að velja verkefni vetrarins og þar verða örugglega elstu hryssurnar okkar tvær í forgangi. Það er samt synd að ná ekki að sinna bæði Heklu og hinum unghryssunum tveimur í vetur en þær koma allar á hús með vorinu. Myrkva frá Álfhólum og Gróska frá Kjarnholtum I verða í þjálfun í vetur enda stefnt með þær báðar í keppni og sýningar á nýju ári.

Jólahátíðin í ár verður sú fyrsta í 25 ár án þess að hafa hesta á húsi. Desember er afar annasamur mánuður, bæði í vinnu og jólaundirbúningi og því verður oftast minna úr verki en lagt var upp með. Vonandi koma fákarnir okkar á hús fljótlega á nýju ári enda tilhlökkunin mikil að hefja nýtt ár af krafti.

Við Myrkva frá Álfhólum gerðum okkur ferð austur á Hellu til að keppa í fjórgangi opnum flokki á Suðurlandsmóti í ágúst. Ferðirnar austur urðu á endanum þrjár því við vorum í 6. sæti eftir forkeppnina á fimmtudegi, fórum í B-úrslit á laugardegi og loks í A-úrslit sunnudegi eftir sigur í B-úrslitum.

Í A-úrslitunum unnum við okkur upp um tvö sæti og skelltum ekki minni keppnismönnum en Sigurði Sigurðarsyni og Sigurbirni Bárðarsyni aftur fyrir okkur með einkunnina 6.87.

Veljið "Read more" til að lesa nánar.

Suðurlandsmót.
Ég var ánægð með okkur Myrkvu í forkeppninni á Hellu og hún kom einbeitt til leiks á nýjum stað og nýjum velli. Á Suðurlandsmótinu var boðið upp á að ríða einn í braut í opna flokkinum sem mér finnst langskemmtilegast. Það er himinn á haf á milli Þess að fá að stýra sínu prógrammi eða að bíða eftir fyrirmælum frá þul. Svona byrjaði ég að keppa í yngri flokkum en forkeppni með fleiri knöpum í braut hófst ekki fyrr en ég var komin í ungmenna eða fullorðinsflokk.

Við Myrkva fengum einkunina 6.70 og 6. sætið eftir hnökralausa og þétta fjórgangssýningu. Ég vonaðist til að ná beint í A-úrslit en það var síðasti knapi í braut sem ýtti okku niður í B-úrslit. Ég var búin að lagfæra prógrammið og betrumbæta frá Íslandsmótinu mánuði áður. Það voru því ákveðin vonbrigði að fá ekki hærri tölur í forkeppninni fyrir mun betri sýningu en á Íslandsmóti þar sem hreinlega allt fór í vaskinn. Það var hins vegar samdóma álit bæði keppenda og áhorfenda að dómar á þessu móti voru almennt frekar lágir og lækkuðu flestöll pör í einkunn frá fyrri mótum. Þeir sem röðuð sér fyrir ofan mig í forkeppni voru hins vegar mun þekktari knapar á reynslumeiri hestum þannig að ég var sátt við heildarniðustöðu forkeppninnar.

Í B-úrslitunum mættum við verðugum andstæðingum, 1. verðlauna kynbótahrossum, fyrrverandi Íslandsmeistara í fjórgangi og þaulreyndum keppnishestum sem höfðu farið langt yfir 7una á fyrri mótum sumarsins. Því miður var Myrkva alls ekki nógu góð í B-úrsitunum og langt frá því að vera eins góð og í forkeppninni. Við vorum enn að stilla saman nýja keppnisstrengi - búnað, upphitun og undirbúningur -sem ekki var réttur á þessum degi. Tölurnar sem við fengum voru verðskuldaðar og lægri en í forkeppni - aðaleinkunn 6.67.

Sigurinn í B-úrslitum var naumur en nægði til að vinna okkur sæti í A-úrslitum daginn eftir.

B-úrslit Fjórgangur 1. flokkur
1.  Saga Steinþórsdóttir / Myrkva frá Álfhólum 6,67
2. Jón Herkovic / Vænting frá Ketilsstöðum 6,63
3. Aðalheiður Anna Guðjónsdóttir / Blossi frá Syðsta-Ósi 6,57
4. Saga Mellbin / Bárður frá Gili 6,50
5. Jóhann Kristinn Ragnarsson / Sleipnir frá Kverná 6,20

Í A-úrslitunum fundum við taktinn á ný og ég var verulega ánægð með frammistöðuna okkar þrátt fyrir ýmsa hnökkra sem skrifast á reynsluleysi okkar beggja. Styrkleiki Myrkvu er hversu jafnvíg hún er á öllum gangtegundum og var engin einkunn undir 6,5. Nokkrar 7,5 sáust á lofti sem strikuðust því miður að mestu út að þessu sinni en markmiðið er auðvitað að sjá meira af þeim á næsta ári og þar yfir.

í A-úrslitunum fengum við 6,67 fyrir hægt tölt, 6,83 fyrir brokk, stökk og yfirferð og 7,17 fyrir fet. Unnum við okkur upp um tvö sæti og skelltum ekki minni mönnum en Sigurði Sigurðarsyni og Sigurbirni Bárðarsyni aftur fyrir okkur í röðinni með einkunnina 6.87.

Fjórgangur 1. flokkur - A-úrslit  
1. Eyjólfur Þorsteinsson / Komma frá Bjarnanesi 1 7,53
2. Bylgja Gauksdóttir / Grýta frá Garðabæ 7,27
3. Sylvía Sigurbjörnsdóttir / Þórir frá Hólum 7,13
4. Saga Steinþórsdóttir / Myrkva frá Álfhólum 6,87
5. Sigurbjörn Bárðarson / Penni frá Glæsibæ 6,77
6. Sigurður Sigurðarson / Hríma frá Þjóðólfshaga 1 6,67

Samantekt frá sumri.
Þetta sumar var okkar fyrsta keppnistímabil saman og liðin voru rúm sex ár síðan ég fór síðast inn í keppnisbraut. Við fórum okkur hægt, mættum á fjögur íþróttamót en vorum vaxandi allan tímann og náðum meistaraflokkseinkunn á öllum mótunum.

Við mættum á eina síðsumars kynbótasýningu á Hellu þar sem Myrkva fékk 8,5 fyrir flesta þætti hæfileikadóms, ekki á sínum besta degi. Á heildina litið þá er ég sátt við sumarið. Keppnisfræðin voru afar ryðguð í upphafi vertíðar en við lærðum mikið af hverju einasta móti og fjögurra ára samvinna okkar Myrkvu skilaði sér í góðum árangri og framförum á tímabilinu.

Það hefði auðvitað verið gaman að mæta á fleiri mót síðsumar, s.s.  Dreyramótið, Tommamótið og Metamótið en við ákváðum að stefna frekar á kynbótasýningu undir lok sumars, stilla betur strengi fyrir komandi keppnistímabil og koma fram sterkari á nýju ári.  

Hér fyrir neðan má sjá upptöku af A-úrslitunum á Suðurlandsmóti:

Flestir eru þeirrar skoðunar að erfiðast sé að þjálfa bestu hrossin. Að biðja þau um afköst umfram önnur hross en gæta jafnframt hófs. Að kunna að hætta og fara af baki þegar hesturinn er sem bestur og hefur gefið þér allt sem hann á.

Það er krefjandi að þjálfa góðan hest til aukinna afkasta en það er líka auðvelt að gleyma sér í smáatriðinum og einhæfri þjálfun. Því reynir á að halda fjölbreytni í vinnubrögðum og gleyma ekki að stundum má bara leika sér! 

Veljið "Read More" til að lesa meira.

Þegar þjálfunartímabilið er farið að spanna hátt í árið þá er mikilvægt að viðhalda gleðinni. Ég hugsa oft til þess sem Benni Líndal talar um í mynbandinu sínu Þjálfun. Það er mikilvægi þess að byggja hestinn markvisst upp til afkasta en einnig að huga að sálarlífi bæði hest og knapa. Að muna hversu mikilvægt það er fyrir báða aðila að viðhalda gleðinni og rifja það upp reglulega hvers vegna við erum hestamenn af líf og sál. Að leika sér með hestinum sínum, gleyma stund og stað.

Með árunum verða vinnubrögðin í hesthúsinu vanafastari, tamningar og gangsetningar verða að vinnu sem þarf að klára. Ég hef því tileinkað mér það á fullorðinsárum að minni mig sem oftast á það hvers vegna ég byrjaði í hestamennsku í upphafi. Það var jú til að hafa gaman af samverunnar og njóta þessarar einstöku frelsistilfinningar og ánægju með hestinum.

Ég veit fátt betra á fallegum sumarkvöldum en að gleyma mér ein með hestinum mínum og fara í reiðtúra eins og ég gerði sem barn. Inn á milli móta og sýninga í sumar fórum við Myrkva til dæmis reglulega upp á Hólsheiðina og lékum okkur á moldargötunum sem hlykkjast um kjarrið á heiðinni. Þar er  algjör ævintýraheimur, perla fyrir þá sem þekkja. Við lékum okkur líka í Rauðhólunum og syntum í Hólmsánni. Við gleymdum stund og stað og við höfðum gaman af félagskap hvor annarar, við vorum að leika okkur!   

Með haustinu hefst nýr kafli í tamningu og þjálfun. Eldri hrossin eru flest að ljúka sínu þjálfunartímabili og fara fljótlega í verðskuldað haustfrí á meðan yngri hrossin setjast á skólabekk. Haustið er góður tími til líta yfir farinn veg og setja ný markmið fyrir komandi vetur.
Það styttist í næstu tamningartörn hjá okkur því Skírnir (5v.) og Hekla (4v.), eru væntanleg á hús í lok þessa mánaðar. Við stefnum á að taka þau á hús til áframhaldandi gangsetningar og þjálfunnar fram í nóvembermánuð áður en við förum í langþráð haustfrí frá hesthúsverkum. Til stóð að taka þriggja vetra unghryssurnar okkar til frumtamningar en það kann að bíða til vorsins vegna anna í öðrum verkefnum. Veljið "Read More" til að lesa um meira.

Af eldri hryssunum er það að frétta að við fórum í síðustu viku í sveitaferð að Álfhólum og tókum þar út þjálfunina á Grósku frá Kjarnholtum I sem hefur verið í þjálfun hjá Söru síðusta mánuðinn. Gróska er á réttri leið og það verður spennandi að halda áfram með hana á nýju ári. Nú fer Gróska í verðskuldað haustfrí til áramóta en markmiðið okkar er að koma fram með Grósku í keppni á fimmgangsvængnum og renna henni síðan í gegnum kynbótadóm næsta sumar.

Myrkva frá Álfhólum fór í hvíld eftir kynbótasýninguna á Hellu í lok ágústmánaðar, eftir langt og strangt þjálfunartímabil frá áramótum. Stefnan er sett á áframhaldandi þátttöku í fjórgangskeppnum á næsta keppnistímabili en einnig stefnum við á að reyna við okkur á nýjum vetvangi, í töltkeppnum. Það verður spennandi að halda áfram að þjálfa Myrkvu á komandi vetri og við stefnum auðvitað að því gera enn betur og fara yfir sjöuna í fjórgangi. Myrkva fór hæst í einkunina 6,87 á Suðurlandsmóti í ágúst en nánar verður fjallað um það mót síðar.

Sú breyting hefur orðið á "stóðinu" okkar að Auðna frá Álfhólum hefur eignast nýja eigendur sem stefna með hana í spennandi nám með haustinu. Auðnu verður sárt saknað úr hesthúsinu okkar en hún er virkilega flott tölthryssa sem er sífellt að bæta við sig í getu og styrk. Við óskum nýjum eigendum innilega til hamingju með góða hryssu - það verður gaman að fylgjast með ykkur í brautinni í framtíðinni!

Það voru ekki liðin nema 16 ár síðan ég fór síðast með hryssu í kynbótadóm og þá fór ég með hryssa sem ég keypti 3ja vetra fyrir fermingapeningana mína og tamdi sjálf. Þrátt fyrir að vera töluvert ryðguð í fræðunum ákvað ég samt með einungis tveggja vikna fyrirvara að slá til og skrá Myrkvu aftur í dóm núna á síðsumarssýningu á Hellu.
Hugmyndin var að gera atlögu að nokkrum tölum í hæfileikadómi sem ekki heppnuðust að fullu vegna hestapestarinnar síðastliðið sumar. Myrkva er búin að vera vaxandi í allt sumar og það var því virkilega freistandi að renna henni aftur í dóm með von um betri tölur. Lesið nánar um kynbótasýningu á Hellu með því að velja "Read More".

Við Myrkva náðum ágætri forsýningu þrátt fyrir að vera aðeins óöruggar í brautinni. Hún hækkaði einkunn sína fyrir brokk úr 7.5 í 8.5 og fyrir einkunn fyrir hægt stökk úr 7 í 8.5 Einkunnin 8,5 fyrir tölt og fet stóðu í stað en því miður lækkaði Myrkva fyrir vilja og geðslag úr 8.5 í 8 og skrifast það líklega mest á reynsluleysi sýnandans. Fyrir byggingu lækkaði Myrkvu um hálfan fyrir bak og lend en hækkaði um hálfan fyrir hófa. Lítilleg breyting á byggingaeinkunn en hækkaði þó úr 7.73 í 7.76. 

Betur má ef duga skal hugsaði sýnandinn að lokinni forsýningu og því var brugðið á það ráð að fá ræktandann og kynbótasýningarsnillinginn Söru Ástþórsdóttir til að reyna við stóru tölurnar á yfirlitinu.

Sara gerið sér lítið fyrir og hækkaði bæði einkunnina fyrir fegurð í reið úr 8 í 8.5 og einkunnina fyrir hægt tölt úr 8 í 8.5. Fleiru tölur hefðu líklega getað hækkað að auki en það kom í ljós á yfirliti að gleymst hafði með öllu að þjálfa greiða stökkið hjá Myrkvu á þessu ári. Þegar í brautina var komið og gefið var í á fulla ferð þá vildi svo illa til að Myrkva fipaðist og kýrstökk út brautina. Þar með fauk möguleikinn á hækkun fyrir bæði stökk og vilja/geðslag út um gluggann í bili.

Engu að síður má vel við una, það er frábær árangur að ná 8,5 nánast á línu ásamt góðum dómsorðum. Níurnar verða bara sóttar síðar því þær eru skammt undan að okkar mati og ýmis sóknarfæri á meðan hryssan bætir við sig á degi hverjum.

Endanleg niðurstaða eftir yfirlitið er því 7.80 fyrir hæfileika og í aðaleinkunn er Myrkva komin með 7.79.
Sjá nánari sundurliðun einkunna og dómsorð fyrir hæfileikaþáttinn hér fyrir neðan:

Tölt: 8,5
   2) Taktgott   3) Há fótlyfta  

Brokk: 8,5
   2) Taktgott   4) Skrefmikið  

Skeið: 5,0

Stökk: 8,0
   3) Svifmikið  

Vilji og geðslag: 8,0

Fegurð í reið: 8,5
   4) Mikill fótaburður  

Fet: 8,5
   1) Taktgott   2) Rösklegt  

Hægt tölt: 8,5

Hægt stökk: 8,5

Um miðjan júlí fór ég í nokkra daga húsmæðraorlof til Söru vinkonu minnar í Álfhólum. Við fjölskyldan höfum farið í sveitinni til Söru á hverju sumri í mörg ár og dvalið í góðu yfirlæti í skemmri eða lengri tíma.

Það er alveg ómetanlegt að komast út úr bænum og dvelja í sveitinni, fylgjast með ungviðinu fæðast og ríða út á frábærum gæðingum. Þegar við vorum ung og barnlaus vorum við frjálsari og dvöldum lengur í senn en með stækkandi fjölskyldu hefur dvalartíminn styst jafnt og þétt. Það var því brugðið á það ráð að þessu sinni að senda húsmóðirna eina af stað til að ná smá forskoti áður en fjölskyldan mætti á svæðið.

Lesið meira um dvölina í Álfhólum með því að velja "Read More"

Hrossaræktarbúið á Álfhólum þarf ekki að kynna fyrir hestamönnum. þar hefur verið stunduð metnaðarfull hrossarækt undir stjórn Söru til margra ára. Það fór líklega ekki heldur framhjá nokkrum hversu rækilega Sara Ástþórsdóttir og fjölskylda slógu í gegn á síðasta landsmóti hestamanna í Skagafirði. Ekki aðeins voru þau með frábæran stóðhest og hryssur í einstaklingssýningum heldur fylgdu þessir einstaklingar einnig feðrum sínum í afkvæmasýningum og minntu loks rækilega á sig á ræktunarbússýningum bæði á föstudags- og laugardagskvöldvöku.

Fremst í flokki fór þar glæsihryssan Díva frá Álfhólum sem hlaut í vor 10 fyrir bæði tölt og vilja og geðslag. Díva er undan Orrasyninum Arði frá Brautarholti og gæðingamóðurinni Dimmu frá Miðfelli, dóttir Hrafns frá Hrafnhólum.

Þess má geta að við eigum náfrænku Dívu, 3ja vetra hryssuna Rósku frá Sólheimum sem er undan Arði frá Brautarholti og Sunnu frá Reykjavík, en Sunna er undan Húna frá Hrafnhólum sem var undan Hrafnhóla-Hrafnsdóttir eins og Dimma frá Miðfelli. Róska kemur til frumtamningar með haustinu og verður spennadi að sjá hvað úr henni verður. 

Í hesthúsinu á Álfhólum standa gæðingarnir í röðum og það eru auðvitað algjör forréttindi að fá að fara á bak þeim mörgum. Því er ekki að neita að það er hverjum hestamanni hollt að kynnast virkilega góðum hestum og sem flestum hestgerðum. Sem áhugamaður um hrossarækt er einnig forvitnilegt að kynnast afkvæmum ólíkra stóðhesta, geðslagi og ganglagi.

En ævintýrin gerast líka í sveitinni og nú hefur komið í ljós að við eigum von á folaldi næsta sumar undan ofurtöltaranum Krák frá Blesastöðum, sem hlaut m.a. 9,5 fyrir tölt aðeins 4 vetra gamall.

Krák frá Blesastöðum þarf vart að kynna. Hann er í hópu ungra og efnilegra stóðhesta, aðeins 9 vetra gamall, en samt hefur hann þegar skilað 20 afkvæmum í fullnaðardóm. Þar af hafa 10 afkvæmi hlotið 1. verðlaun, eða helmingur allra sýndra afkvæma. Það má ætla að sú tala geti hækkað fljótlega enda mæta afkvæmi Kráks ung í dóm og eiga því mikla möguleika á að hækka að ári. 

Það vekur athygli að í þessum afkvæmahóp hafa tvö afkvæmi hlotið 9,5 fyrir tölt, átta afkvæmi hafa hlotið 9, sex afkvæmi hafa hlotið 8,5 og fjögur hafa hlotið 8 sem er jafnframt lægsta einkunnin sem nokkurt afkvæmi hefur hlotið hingað til fyrir þá gangtegund.
 
Við erum full tilhlökkunar að fá loksins folald eftir tveggja ára hlé og ekki er verra að það sé úr gæðingahreiðrinu á Álfhólum. Nánar verður fjallað um þetta ræktunarævintýri í Álfhólum síðar.  

Hestarnir okkar eru komnir aftur á hús í Víðidalnum eftir tveggja vikna pásu í Mosfellsdalnum. Tamningar ganga vel með unghrossin tvö og þau eru að koma á skemmtilegasta tímabilið þegar gangurinn er að opnast og skilningur að aukast. Eftir margra ára bið kemur loksins ljós hvaða hæfileikum unghrossin búa yfir og hverjir möguleikir þeirra verða í framtíðinni. 

Lesið nánar um unghrossin með því að velja "Read More".

Skírnir frá Reykjavík er stór og stæðilegur 5 vetra sonur gæðingsins Álfasteins frá Selfossi og er því m.a. bróðir heimsmeistarans Spuna frá Vesturkoti. Skírnir, sem var taminn í tvo mánuði síðastliði haust, býr yfir afar góðum gangskilum og hefur til að bera rúmar og góðar gangtegundir. Hann verður vafalítið fyrirtaks reiðhestur, jafnvel efni í fimmgangs keppnishest. Verkefnið næstu vikurnar er að styrkja Skírni á gangi og kenna honum helstu grunnvallaratriði þjálfunar. Skírnir verður í þjálfun hjá okkur fram á haustið.

Hekla frá Reykjavík er 4 vetra og kemur skemmtilega á óvart. Hekla hefur tekið út mikinn andlegan og líkamlegan þroska frá því í haust. Hún var mjög kraftmikil í frumtamningu og fór um eins og byssukúla síðastliðið haust þegar við tömdum hana í rúman mánuð. Hún var alveg hrekklaus en það var mikill og óbeislaður kraftur sem þurfti að ná stjórn á. Eftir vetrarhvíld og  tíu skipti þetta sumarið er viðmót hennar gjörbreytt og það er orðið afar auðvelt og virkilega skemmtilegt að vinna með hana. Leiðtogahlutverkið er orðið skýrt og mikill vinskapur hefur myndast á milli manns og hests. Við erum aðeins farin að leita eftir góðganginum og eins og við mátti búast þá er hann skammt undan enda foreldrarnir með 9,5 (Vígar) og 8,5 (Rella) fyrir tölt. Við tömdum albróðir Heklu á sínum tíma og er hann mikill gæðingur sem hefði eflaust átt erindi inn á keppnisvöllinn ef honum hefði verið stillt upp. Því bindum við góðar vonir við Heklu okkar. En svo er það að sjálfsögðu bara að bíða og sjá hvað úr verður.

Í síðasta mánuði skelltum við okkur í 3ja daga hestaferð með hryssurnar okkar, þær Auðnu og Myrkvu frá Álfhólum ásamt Grósku frá Kjarnholtum I. Þetta var strembnari ferð en ég átti von á en félagskapurinn var góður og allt gekk vel. Einnig skelltum við okkur Myrkva á Íslandsmót á Selfossi með litlum fyrirvara og lágmarks undirbúningi.

Hestaferðin hófst í Kjósinni aðra helgina í júlí og fórum við um margar af bestu reiðgötum suðvesturlands. Má þar nefna Láxárbakkana í Kjós, þjóðgarðinn á Þingvöllum og Þjórsárbakkana í Árnessýslu. Við fengum að fljóta með reyndum ferðamönnum sem voru að undirbúa hesta sína fyrir tíu daga hestaferð um fjallabak syðri og nyrðri sem hófst viku síðar. Lesið nánar um hestaferðina og Íslandsmót með því að velja "Read More".

Hryssurnar fengu að hlaupa mikið lausar en svona langar dagleiðir eru krefjandi og í raun er það ekki nema fyrir harðnaða ferðahesta að fara 150 km á aðeins þremur dögum. Hryssurnar stóðu sig samt allar með stakri prýði en þær voru vissulega þreyttar eftir sína fyrstu alvöru hestaferð.

Gróska og Auðna fengu verðskuldaða hvíld í tvær vikur eftir ferðina en Gróska er nú komin í framhaldsþjálfun til Söru vinkonu okkar á Álfhólum. Myrkva fór hins vegar beint inn á keppnisbrautina á Íslandsmótinu á Selfossi eftir aðeins tveggja daga hvíld þar sem við kepptum í fjórgangi við þá allra sterkustu. Við gerðum okkar besta við þessar aðstæður en vorum full kærulausar í undirbúningnum og riðum inn á brautina án þess að hafa ákveðið eða æft prógrammið.

Við vorum snemma inn á, þriðja hross í braut. Margt fór úrskeiðis, Myrkva losnaði upp á stökk af brokkinu á langhliðinni fyrir framan dómarana, tók ytra stökk í misheppnaðri stökkskiptingu og ýmis önnur smáatriði voru ekki eins og lagt var upp með. Við náðum samt að sannfæra hvor aðra um að við eigum erindi á brautina og einkunnin 6.67 fyrir svona gallaða sýningu verður að teljast ávísun á betri tölur við kjör aðstæður. Við stefnum ótrauðar áfram og næst er stefnan er sett á suðurlandsmótið á Hellu.     

Hér fyrir neðan má sjá upptöku af forkeppninni okkar á Íslandsmótinu. Myndband af æfingu snemma í júlí má sjá HÉR.