Ánægðir kaupendur

Gróska frá Kjarnholtum I og Doro Schlesinger.




















​Í ársbyrjun seldum við fimmgangshryssuna okkar hana Grósku frá Kjarnholtum I til Danmerkur. Gróska kom til okkar vorið 2009, þá fimm vetra gömlu. Við áttum góða tíma saman og kepptum í hinum ýmsu fimmgangsgreinum. Nýr eigandi Grósku er þegar byrjaður að láta til sín taka á keppnisbrautinni og er afar ánægð með að vera komin í skeiðgírinn á ný. Þær stöllur hafa þegar tekið þátt í fimmgangi, gæðingaskeiði og A-flokki og raðað sér í verðlaunasæti. Það verður gaman að fylgjast með þessu flotta pari á komandi keppnistímabili og óskum við þeim góðs gengis í framtíðinni. 

---

Auðna frá Álfhólum og Murray's Mug Milot.

Við höfum einnig nýlega fengið fréttir frá Auðnu frá Álfhólum sem komin er til nýrra eigenda í Kaliforníu í Bandaríkjunum. Fengið við fallegt bréf frá nýjum eiganda Auðnu þar sem hún þakkaði okkur fyrir vandaða tamninguna og þjálfunina á sínum uppáhaldshesti. 

Auðnu keyptum við unga og efnilega, aðeins 3ja vetra gamla, frá Söru vinkonu okkar í Álfhólum. Auðna var tamin og þjálfuð af okkur í þrjú ár þangað til við seldum hana áfram haustið 2011, sex vetra gamla og í framhaldinu var hún seld til Bandaríkjanna. Það gleður okkur óneitanlega að fá fréttir af þeim hestum sem hafa farið í gegnum okkar hendur en eru komin á nýjan og góðan stað.

​Við fjölskyldan temjum og þjálfum okkar hesta í frístundum meðfram vinnu og við reynum að halda fjöldanum í skefjum og innan tveggja stafa tölu. Okkur fæðast reglulega folöld en þess á milli höfum við gaman af því að fjárfestum í ungum og efnilegum unghestum. Við leggjum áherslu á að temja okkar unghross sjálf og kynnumst þannig upplagi þeirra og eiginleikum. Flest eignast þau samt síðan ný heimili eftir að tamningu lýkur en þau sem við eigum eru hér á síðunni. ​Ein þeirra er Skriða frá Reykjavík, sex vetra klárhryssa úr okkar ræktun undan 1. verðlauna Glampasyninum Mola frá Skriðu og sýndri hryssu með 7.72 í aðaleinkunn. Skriða er þæg og örugg og gæti vel hentað sem útreiðarhestur fyrir alla fjölskylduna og jafnvel í keppni. Nánari upplýsingar um söluhesta má finna hér.

---