Fimm daga hestferð

Eftir tæplega sex vikna sumar og hestafrí tókum við hestana okkur aftur á hús í lok júlímánaðar. Með skömmum fyrirvara ákváðum við að lengja sumafríið um nokkra daga og skella okkur með Álfhólafjölskyldunni og fylgdarliði þeirra í alvöru fimm daga hestaferð um verslunarmannahelgina með tæplega sextíu hesta rekstur. ​

Þetta var fyrsta alvöru hestaferð barnanna okkar (9 og 12 ára) sem stóðu sig þrælvel og voru þau meira og minna í hnakknum alla ferðina. Líklega var um þriðjugur ferðalanga undir 18 ára aldri og meðalaldur hestana var heldur ekki mjög hár en allt fór vel þrátt fyrir töluverðan hasar á heimleiðinni. Það voru örugglega liðin tæplega tíu ár síðan við fórum síðast í álíka hestaferð með sama hópi og var það samdóma álít ferðahópsins að láta ekki líða svo langt í næstu ferða enda strax farið að ræða um næstu ferð á sama tíma að ári.  

Það var líka mikil upplifun fyrir börnin að ferðast og gista í fjallaskálum utan alfaraleiðar þar sem hvorki var netsamband eða rafmagn. Það var því leikið utandyra fram að myrkri og þá var tendrað á kertum og tekið í spil. Veðrið lék við okkur alla dagana og á kvöldin var setið úti í stafalogni við kertaljós. Það sem eftir stendur er frábær ferð með fjölskyldunni og góðum vinum þar sem ógleymanlegar minningar voru skapaðar í hinni dásamlegui fallegu náttúru.    

---