Heilsað upp á Mjölni

Mjölnir 2v. frá Reykjavík.

Við kíktum nýlega í Kjósina og skoðuðum ungfolann Mjölni frá Reykjavík áður en hann fór á fjallið (Esjuna) með öðrum unghestum. Mjölnir dvelur í góðu yfirlæti hjá Svönu og Guðmundi í Miðdal í Kjós. 

Mjölnir er frumburður Myrkvu okkar. Hann er tveggja vetra geldingur undan gæðingnum Ölni frá Akranesi (8.82) sem jafnframt er tvöfaldur landsmótssigurvegari í flokki fimm og sjö vetra stóðhesta. Mjölnir er afar áþekkur Myrkvu í útliti og ekki mjög stór enn sem komið er. Hann er alveg einstakalega ljúfur og geðslegur foli sem fer um á taktgóðu og hreyfingarfallegu tölti og brokki undir sjálfum sér. Eftir vetrardvöl í útigangi með stóðinu þá gátum við auðveldlega gengið að honum í hópnum, mýlt hann og teymt frá stóðinu. Það verður spennandi að kynnast þessum unga fola betur þegar við byrjum að temja hann innan fárra ára.