Í upphafi árs

Vinur frá Kirkjubæjarklaustri

​Hrossin okkar eru hægt og rólega að tínast á hús í upphafi vetrar og þjálfunin er að keyrast í gang. Mói, Myrkva og Eldey eru þegar komin á járn í Víðidalnum og þau koma vel undan hausti þó að aðeins hafi borið á hnjóskum í baki og lend þegar þau komu á hús fyrir jólin. Til viðbótar höfum við fengið lánaðan 24 vetra höfðingja frá Birtu mágkonu minni til að kenna börnum okkar í vetur. Vinur er afar traustur og þægur öðlingur en hann er samt viljugur og rúllar áfram á tölti. Börnin hafa þegar tekið miklu ástfóstri við hann og áhugi þeirra eflist samhliða auknu trausti.    

Þrjú hross eru enn ókomin á hús en eru væntanlegir á næstu vikum. Þar af eru tveir ungfolarnir undan Dimmuborg frá Álfhólum, Krákssonur á fimmta vetur og Framherjasonur á fjórða vetur. ​Þessir hestar verða sóttir einhverntímann á næstu vikum en það hefur reynst okkur vel að hafa rúmt um hestana í húsinu í byrjun vetrar.

Við kjósum að hafa færri þjálfunarverkefni í hesthúsinu á meðan skammdegið er í hámarki. Þegar daginn fer smám saman að lengja þá er auðveldara að bæta fleiri verkefnum og fjölskyldan hefur að auki rýmri tíma til samveru í hesthúsinu á virkum dögum eftir skóla, vinnu og tómstundaræfingar barnanna. 

---