Þjálfun 2013

Steinþór Nói 6 ára á Grósku.

Tvær fyrstu hryssurnar komu á hús í byrjun febrúar eftir fjögurra mánaða pásu frá útreiðum. Þetta verður að teljast lengsta pása húsfreyjunnar síðari ára, hið minnsta síðan á síðustu meðgöngu fyrir rúmum þremur árum. Frá þeim tíma höfum við haft hestana svo til samfellt á járnum, þar til núna í haust. Aldrei fyrr höfum við heldur tekið inn svona seint að vetri en okkur líkar það vel að færa "haustpásuna" fram á veturinn. Ríða út fram í október og taka síðan á hús í febrúar, sleppa þar með útreiðum yfir mestu skammdegismánuðina.

Fyrstu hryssunrnar á hús eru öldungarnir í hópnum, þær Myrkva frá Álfhólum og Gróska frá Kjarnholtum I, báðar á níunda vetri. Ungmeyjarnar tvær á fimmta vetri, þær Róska frá Sólheimum og Skriða frá Reykjavík, eru væntanlegar á hús í maímánuði og frumtamningarfolarnir tveir undan Ágústínusi koma til tamningar í sumar.

Það er lúxuslíf að hafa aðeins tvær fulltamdar hryssur í þjálfun á þessum árstíma og í raun alveg nóg samhliða fullri vinnu, háskólanámi og fjölskyldu. Okkur klæjar vissulega í fingurnar að halda áfram með unghrossin en ákváðum að forgangsraða þjálfun keppnishestanna framan unghrossum þennan veturinn. Það hefur hins vegar reynt á Grósku okkar í nýju hlutverki. Hún hefur tekið að sér, meðfram öðru, að kenna syni okkar mannganginn í hestamennskunni. Það er ómetanlegt að hafa í húsinu traustan hest sem börnin geta æft sig á en samhliða undirbúum við okkur undir fimmgangskeppnir vorsins. Það styttst í fyrstu íþróttarmót ársins og það verður spennndi að takast á við nýtt keppnistímabil með brúnkurnar tvær. 

---