Mótastand í maíbyrjun

íþróttamót Andvara 2012.

Maímánuður er mikill mótamánuður í hestaíþróttum. Af einhverjum ástæðum þurfa öll íþróttamótin á suðvesturhornunu að fara fram á þremur helgum í maímánuði. Ekkert íþróttarmót er síðan á mótaskrá á þessu svæði fyrr en í ágúst. Flest hross eru í sínu besta formi yfir sumartímann og það er mikil synd að ekki séu haldin nein almennileg (WR) íþróttamót í júní og júlí. Síðustu tvö ár hafa hins verið haldin skemmtileg gullmót á þessum tíma en af einhverjum ástæðum hafa þau mót ekki sést á mótakrá LH. Í ágúst eru hins vegar skipulögð nokkur opin mót á suðvesturhorninu og þá eru fleiri en eitt mót skráð á sömu helgarnar. Það væri til mikilla bóta fyrir bæði keppendur og áhorfendur ef þessum mótum væri dreift yfir lengra tímabil.  

---

En það sem af er maímánuði þá höfum við Myrkva frá Álfhólum mætt á þrjú íþróttamót, Reykjavíkurmeistaramót í Fáki (WR), íþróttamót Harðar (WR) og íþróttamót Andvara um liðna helgina. Framundan er síðan fyrsta B-flokkskeppnin í rúmlega 10 ár á gæðingamót Fáks. 

Það verður að segjast eins og er að sýningin á Reykjavíkurmeistaramóti fór algjörlega í vaskinn. Ég stökk úr próflestri til að taka þátt í fjórgangi og þrjú af fimm atriðum misheppnuðust algjörlega, einkunn upp á 6.03. Viku síðar gerðum við aðeins betur á íþróttamótinu í Herði en þar var mikið riðið í forkeppni og þol- og þrekleysi okkar Myrkvu eftir próflesturinn fór að segja til sín. Einkunnin þó skárri, 6.40 og 6.-7. sæti í B-úrslitum. Þar hækkuðum við okkur upp í 6.60 í spennandi keppni við tvo glæsilega stóðhesta frá Margrétarhofi og tvo flotta geldinga frá Sauðárkróki. 

Á íþróttarmótinu í Andvara vorum við á svipuðum slóðum, fengum 6.30 í forkeppni í skítakulda og roki. Sú frammistaða dugði okkur inn í A-úrslit í 5.-6. sæti. Ég var ánægð með okkur í úrslitunum og við áttum góðan dag fyrir utan yfirferðina sem reyndist okkur erfið, 6.0 á línuna. Í afar jafnri keppni enduðum við með einkunnina 6.53 og 4. sæti. 

A úrslit, fjórgangur 1. flokkur:  
1 Fredrik Sandberg / Svali frá Þorlákshöfn 6,70 
2 Jóhann Kristinn Ragnarsson / Sleipnir frá Kverná 6,60 
3 Gunnar Már Þórðarson / Atli frá Meðalfelli 6,57
4 Saga Steinþórsdóttir / Myrkva frá Álfhólum 6,53 
5 Jón Ó Guðmundsson / Draumur frá Holtsmúla 6,33