Unghryssurnar á skólabekk

Róska til vinstri, Skriða til hægri.

Loksins gafst tími til að sækja fimm vetra hryssurnar okkar, þær Skriðu Moladóttir og Rósku Arðsdóttir. Við verðum með þær í þjálfun í sumar og fram á haustið ásamt fjögurra vetra folunum undan Ágústínusi frá Melaleiti sem koma til tamningar í næsta mánuði. Ágústínus stóð sig annars ágætlega í A-flokknum á gæðingamóti Fáks og hafnaði í 3ja sæti með 8.78 þrátt fyrir að önnur skeiðferðin hafi klikkað. Það verður spennandi að sjá hvaða efniviður leynist í folunum okkar sem skýrist væntanlega betur með haustinu. 

Tamningin á unghryssunum fer vel af stað og þær hafa litlu gleymt frá frumtamningunni síðasta sumar en þá voru þær gerðar vel reiðfærar. Stefnan er að hafa þessar tvær á húsi næsta vetur og koma þeim almennilega á legg.  

Framundan er tvö stórmót í hestaíþróttum, Gullmót í Víðidal og Íslandsmót í Borgarnesi. Líklega hleypum við keppnisbrúnkunum á grænar grundir eftir Gullmótið og tökum þá stöðuna með framhaldið, verður það áframhaldandi mótastand eða stefnumót við stóðhesta.    

---