Verkefnin framundan

Sumarið 2009 fæddust okkur tvö myndarleg hestfolöld undan Kolfinnssyninum Ágústínusi frá Melaleiti (8.61). Síðan þá hefur fækkað jafnt og þétt í stóðinu okkar og á síðustu tveimur árum um alls fimm hesta. 

Heildarfjöldinn er því að komast í gott jafnvægi við breyttar áherslur okkar í hestamennskunni. Timinn er takmörkuð auðlind og það er tímafrekt að byggja ungan hest upp til afkasta. Við viljum frekar einbeita okkar að því að fylgja eftir þeim verkefnum sem þegar eru vel á veg komin í stað þess að byrja sífellt frá grunni. Eftir því sem hestunum fækkar verður einnig skemmtilegra og auðveldara að verja meiri tíma í hvert og eitt verkefni.  
  
Síðustu tvö frumtamningarverkefnin í bili eru ungfolarnir tveir undan Ágústínusi. Þeir fara nú báðir á fjórða vetur og upphaflega ætluðum við að frumtemja þá í haust en sökum anna í vinnu og öðrum verkefnum gafst ekki tími til þess. Þetta eru stórir og myndarlegir folar sem spennandi verður að temja með vorinu. Komandi ár verður því áfram annasamt í tamningunum með þessi fjögur unghross okkar en það hyllir undir breytta tíma.   

Þeyr frá Reykjavík, 3 vetra í október 2012.